舞林高手陳裕光 「水中天」宴請各方好友

商界入面有好多隱世舞林高手，就好似大家樂非執行董事陳裕光（Michael）同太太Pauline，每年都會喺ClubOne宴請好友共聚，學咗幾年舞嘅《晴報》社長麥華章都係座上客，仲一齊跳番part舞！

今年Michael就喺新開嘅ClubONE「水中天」舉辦舞林大會，宴開15圍，有成200幾人出席，包括太興飲食集團創辦人兼主席陳永安、四洲集團主席戴德豐等。

原來呢度今年6月先開幕，原本係有近30年歷史嘅沙田明星海鮮舫，經改裝後樓高3層，頂樓仲有天台，感覺好似置身郵輪。

Michael兩夫婦嘅感情簡直係羨煞旁人，舊年係佢哋結婚40周年，每年都會一家人上台獻唱，今年亦唔例外，一對仔女聯同新抱、女婿、4個孫仔大合唱《Que Sera, Sera》，場面非常溫馨！

當晚最有意思嘅，就係太興飲食集團董事兼總經理陳淑芳（Jojo）同一班舞蹈藝員，用舞蹈跳出Michael兩夫婦嘅愛情故事，實在令人讚嘆。

而舞林高手之一嘅陳永安，之後都同外籍跳舞老師Christina表演Samba，睇到大家拍爛手掌！