星街小區行特色小店 歎限量新穎雪糕

暑假就完，不但小朋友要收拾心情準備返學，大朋友亦要把握時機，好好策劃炎夏消遣「最後一擊」。最近公關姊妹就向黛安推介位於灣仔嘅「星街小區」，區內唔止有極多特色小店，啱晒文青邊買邊打卡，呢排仲推出緊好多暑期倒數優惠！

好似由即日起至下個月12日，逢周三、周六同周日，只要喺指定商戶消費滿$250，就可換到以日、月、星街為靈感製作嘅限量雪榚。而且口味超級新穎，好似用上越南咖啡味雪糕配上焦糖麵包粒嘅「日街Dramacone」、夠晒refresh，最啱幫大家power up去送夏迎秋。藍藍雪糕上高掛弦月嘅「月街Dramacone」，唔止睇得，仲用上濃厚嘅黑朱古力味意式雪糕配布朗尼蛋糕粒，啖啖都好滋味。

公關姊妹仲話，星街小區呢排多咗唔同新店進駐，好似PURE Yoga全新的兩層瑜伽中心9月中就開幕，到時行完街仲可做下運動放鬆；零廢走塑嘅天然有機生活雜貨店Edgar都啱啱開咗，想買有機食材，話都無咁易啦。