星光行翠園 獨有透明燒烤爐 歎明爐脆皮燒鵝

「呢味安格斯叉燒係呢間舖頭獨有㗎，一陣記住試埋我哋嘅燒鵝……」早兩日美心中菜及m.a.x. concepts COO李文賢（Martin）請黛安食午飯，選址喺剛完成大翻新嘅尖沙咀星光行翠園旗艦店。新店設計明亮舒適，將河流等自然元素融入天花、吊燈，令人眼前一亮，不過最令黛安回味仲係賣相同味道都一流嘅食物！

「呢味燒鵝係用我哋最原始嘅配方製成，你試下。」Martin果然好介紹，呢隻燒鵝認真無得頂！皮脆肉滑，仲好juicy，質素絕對可以同燒鵝名店平分秋色。

其實呢味燒鵝未上枱，黛安已經留意到呢道咁精緻嘅菜式，事關呢間翠園有一大特色，就係用餐大堂嘅櫥窗放咗有兩部透明燒烤爐，客人可邊飲茶邊欣賞燒味烤製嘅過程，望住白雪雪鵝身烤至皮脆肉香，未食已流晒口水。

聽Martin講，曾經試過有茶客本來已準備埋單，點知準備離席之際見到個燒烤爐，忽然食指大動，即刻決定要食埋碟燒鵝先走，足證呢個玻璃烤爐燒鵝有幾大吸引力！

美心首間粵菜酒樓 逾40年歷史

唔講唔知，原來呢間翠園已有40幾年歷史，對美心集團意義重大。Martin介紹話，事緣1970年，美心創辦人伍沾德先生喺大阪世博香港館開咗間pop-up的粵菜餐廳，向全球旅客介紹正宗粵菜，好評如潮，更贏得「博覽會十大最佳餐廳」美譽。呢次經驗激發起佢開中餐廳念頭，遂於1971喺星光行開咗美心第一間粵菜酒樓「翠園」。旗艦店翻新後，加設豪華VIP房，裏面仲有個提供20多款茶葉嘅mini-tea bar，畀大家望住維港美景泡茶兼品茶，真係寫意到唔捨得走。