Arbor月底推精選晚餐 星級大廚聯手炮製

黛安嚟緊打算同班好姊妹飯聚，提前慶祝中秋節，剛好遇上《經濟日報》及《晴報》社長麥華章，佢就推介去今年4月新開嘅新派法國餐廳Arbor，嚟緊仲有星級名廚大聯手炮製九道菜晚餐，真係機會難得！

黛安聽到介紹，即刻都做下功課，原來Arbor係由美容護膚品牌FANCL老闆娘陳馬木蘭（Michelle）開設，Michelle一向熱愛美酒佳餚，近年仲進軍埋餐飲業，成立咗Gourmet Dining Group，旗下已經有4個餐飲品牌，一共開咗9間餐廳，包括米芝蓮一星餐廳Épure，認真厲害。

黛安收到風，知道今個月29至31號，Arbor會邀請大阪米芝蓮兩星、亞洲50最佳餐廳排第17嘅法國餐廳La Cime主廚高田裕介（Yusuke Takada），同嚟自芬蘭、曾經任職米芝蓮2星同3星餐廳嘅Arbor主廚Eric Räty，以日本食材一齊炮製九道菜精選晚餐，每位$3,688再加一。聽講Arbor開業至今，已經成為打卡熱點，今次咁千載難逢嘅機會，一定要訂定枱啊！