鏞記 × K11 推限量月餅禮盒

黛安知道有75年歷史嘅鏞記酒家，今年第一次推出月餅，仲同K11 crossover，限量750盒咋！

公關姊妹話，「鏞記×K11特別紀念版月餅禮盒」係雙黃黃蓮蓉月，由月餅、到餅模、禮盒都用心製作。月餅嘅蓮蓉用咗湖南挑手湘蓮，粒粒都由人手精挑細選，再加入99%純正蔗糖而成嘅純正黃蓮蓉，甜度適中，蛋黃就用咗農場頂級鴨蛋，餅皮亦都用優質麵粉搓成，皮薄餡靚。

餅模更專誠去廣州搵老師傅打造；仲邀請本地年輕紙雕藝術家設計，配以先進切割技術，做出紙雕月餅禮盒。

由內到外都講究推廣傳統文化，承傳手藝，正正係K11創辦人鄭志剛同鏞記酒家集團財務總監甘蕎因嘅理念。想食嘅話，記得去鏞記酒家或者K11 Design Store買呀！