DUTY ZERO機場正式開業 試飲免稅靚酒

黛安最鍾意shopping，去旅行都會喺機場行下免稅店睇下有咩着數。原來由中免—拉格代爾有限公司開辦嘅DUTY ZERO by cdf 8間免稅店，噚日已喺香港國際機場正式啟業。

聽中免—拉格代爾有限公司總經理蔡炳偉講，DUTY ZERO售賣嘅產品會係亞太區主要機場內價錢最平嘅免稅品。如果客人發現其他機場嘅免稅品平啲，佢哋承諾會將差額原銀兩倍奉還！

黛安知道，公司已經喺8間免稅店內，增設咗11個互動體驗區，包括虛擬遊戲、現場調酒等服務。其中嘅自動調酒服務，客人喺調酒區嘅電子枱落單後，電腦就會幫你調製雞尾酒，最後就會由侍應幫你加冰同遞上。

此外，DUTY ZERO仲會為每位手持登機證嘅成年乘客，供應1杯酒精試飲，8間免稅店共有17個試飲點，各位姊妹記住唔好錯過呀！