玩轉香港迪士尼 Cookie全球首度登場

迪士尼樂園咁夢幻，黛安一向好鍾意去。一向好受歡迎嘅Duffy，佢嘅新朋友小狗Cookie噚日喺香港迪士尼首度登場，同入園嘅遊客say個hi，成為全球首個可以見到Cookie嘅園區！公關姊妹特登安排咗戴住粉紅色蝴蝶結廚師帽嘅Cookie喺小鎮影院︰「我與Duffy遊歷之旅」同300個粉絲合照，有粉絲更遠道從日本嚟見Cookie。

日本遊客岩野聡美話，佢一向都係Duffy與好友嘅超級鐵粉，每次嚟香港都會買好多Duffy精品，舊年仲特登來港一見首次喺香港現身嘅StellaLou。「今次可以再企喺度迎接Cookie，感覺真係好奇妙！」

Duffy與好友都有唔少本地粉絲，Tiffany Wong就係其中一個，佢話︰「今次Cookie登場，唔止係香港園區首次搶先全球迎接最新嘅迪士尼角色，仲要係Duffy嘅好朋友，真係份外有意義。」

為咗慶祝Cookie加入香港迪士尼大家庭，香港園區即日起會派發紀念版貼紙。園區仲特登準備咗超過50款全球獨家嘅Cookie主題商品，當然唔少得頭飾、毛公仔、限量版徽章呢啲粉絲必儲之選啦，黛安都決定今個星期去探下佢！