挪亞方舟職業特工 小朋友體驗做機師

暑假就到啦！各位爸爸媽媽煩惱緊帶小朋友去邊度玩？黛安知道挪亞方舟會喺7月14號至8月26號，每逢周末舉行「職業特工大本營」，畀小朋友一嘗見工嘅滋味，仲可以即刻返工，體驗做飛機師、消防員、機艙服務員等行業嘅滋味。

公關姊妹話，小朋友可以喺園內自由「應徵」八大職業，如果揀咗飛機師，就可以進入由本地飛行學校Aero Institute策劃嘅飛凡機師訓練中心，入去模擬駕駛艙，操作飛行模擬儀器，試下控制飛機升降，仲教埋專業術語。另外，仲有機艙服務員培訓學校，可以體驗空中服務員日常工作，包括派送餐點、逃生安全指示等。

而家只要喺挪亞方舟正門票務處、挪亞方舟網上訂票平台，或旺角新世紀廣場1樓商場顧客服務中心，購買或換領入場票，就可以獲派「工作日誌」，免費參加活動。