PayMe增值額 最高升至$5萬

電子錢包愈來愈普遍，滙豐噚日就宣布，PayMe用戶可連結滙豐個人銀行戶口進行增值，仲可以將每月增值上限提高至3萬元，如果用戶提供香港住址資料，增值限額仲可以進一步提高到5萬，呢項功能今個星期內開始啦。

滙豐香港區零售銀行及財富管理業務主管欣格雷同黛安講，PayMe自去年推出以來，市場反應理想，成為全港最受歡迎嘅流動支付應用程式之一；滙豐推出新服務，除咗方便舊客戶增值，仲方便到依家無信用卡、但又想用PayMe嘅滙豐客戶。

滙豐客戶如想連結滙豐銀行戶口同PayMe，只須提供電郵地址、滙豐銀行戶口持有人嘅姓名、銀行戶口號碼同香港身份證號碼，戶口就可即時連結。PayMe用戶可用滙豐銀行戶口或任何銀行嘅信用卡增值，亦可混合兩種使用，以銀行戶口增值，每月上限3萬元，但用戶亦可透過銀行戶口增值25,000港元，同用信用卡增值5,000港元；而連結成功後，用戶會收到PayMe嘅推送資訊同電郵通知。

滙豐客戶仲可以連結存摺儲蓄戶口、綜合理財戶口、結單儲蓄戶口、獨立往來戶口、萬用戶口及大學生理財戶口，但聯名戶口就暫時唔適用。

欣格雷仲話，正積極開通透過其他銀行戶口增值PayMe嘅功能，期望好快推出。電子錢包咁方便，黛安以後去shopping唔使帶現金喇！