海洋公園再添新成員 鷹鯆BB第四季登場

黛安知道海洋公園近排多咗2隻好可愛嘅初生鷹鯆BB，男BB叫「波波」，女BB叫「點點」，佢哋嘅特徵係背部深灰色或棕啡色，同埋有鮮明嘅藍白、綠、珍珠或黃色斑點，嘴巴係腹部，方便捕食水底嘅獵物。鷹鯆BB正接受護理訓練，估計今年第四季就可以同大家見面啦。

海洋公園水族員同黛安講，海洋公園喺2009年由鹿兒島引入咗3條鷹鯆，兩雄一雌，現年約10歲。3條鷹鯆去年性成熟後進行交配，雌性鷹鯆成功喺今年1月誕下首次於香港出生嘅2隻鷹鯆BB。

黛安仲知道，原來鷹鯆學名係「Aetobatus Ocellatus」，又叫「斑點鷂鱝」，雙鰭嘅寬度平均有1.8米，重量可達230公斤，多數出現喺全球熱帶同溫帶嘅沿岸水域，例如會喺珊瑚礁出沒，又會係潟湖覓食。鷹鯆習慣群游，繁殖速度較慢，多數喺沿岸水域生活，容易被各類漁具纏住，漁民亦會捕獵佢哋，攞佢哋魚肉同魚油。佢哋同時屬於國際自然保護聯盟瀕危物種紅色名錄，即易危物種。

公關姊妹又講，鷹鯆BB正進行緊目標訓練，2隻鷹鯆BB各有指定形狀目標，當佢哋成功識別同觸碰相應目標就有獎勵，用「正面獎勵」訓練方式，讚賞鼓勵同強化佢地嘅期望行為，以提高佢哋可自願配合護理員、獸醫團隊嘅餵飼同身體檢查。