接納導盲犬 增特殊設施 UA助視障聽障人士「睇」戲

天氣咁熱，最好就係去戲院睇戲！黛安知道UA前日借出場地作為「P牌」導盲犬嘅真實場景培訓用途，導盲犬可體驗由購票、入座、電影放映、使用洗手間及離開電影院等唔同細節，黛安見狗狗都好乖，即使身處漆黑環境，電影放映時又會發出不同聲響，但狗狗都非常穩定，好快可以適應。

除咗支持導盲犬培訓工作，UA旗下2間戲院，包括青衣城（House 2）同UA Cine Times（House 2）最近增設咗觀影輔助設施，公關姊妹同黛安講，只要電影版本有供視障人士專用嘅口述聲軌（Audio Track），視障人士就可透過口述聲音欣賞電影，令佢哋掌握更多畫面上嘅描述同資訊。而新設施亦為有「T」掣助聽器嘅觀眾提供聽力支援，放大同集中電影原有聲道，令佢哋更易投入電影。

娛藝（UA）院綫董事總經理黃嗣輝話，希望今次活動為導盲犬培訓打下基礎，提供適當協助配合導盲犬訓練，UA亦計劃喺更多合適戲院加入唔同人士需要嘅無障礙裝置，希望透過大眾娛樂建構共融社會。