利東街展出Vespa綿羊仔 重現《羅馬假期》經典場面

唔少鐵騎迷都愛綿羊仔，貪佢又可愛又有型，黛安就鍾情意大利品牌Vespa。上個月喺西營盤舉行咗《Vespa Hong Kong Story》相片展相當受歡迎，公關姊妹同黛安講，嚟緊嘅星期五（5月25日）至6月3號，展覽會搬到灣仔利東街，今次仲有古董Vespa電單車實物睇，就算坐上去影相都無問題，大家唔好錯過打卡機會啊！

Vespa係意大利出產，上世紀50至70年代，香港已經好多人用，仲會舉行賽車。《Vespa Hong Kong Story》相展就係由香港第一代Vespa代理商「寶靈頓車行」提供，真係唔話得。姐妹話，今次展覽係希望跳出相框，等大家可以近距離接觸呢款經典綿羊仔，就算親身試坐、影埋婚紗照都絕對無問題。

姊妹仲話，利東街會重現柯德莉‧夏萍（Audrey Hepburn）喺經典電影《羅馬假期》（Roman Holiday）中，同帥哥格利哥力柏（Gregory Peck），駕駛住Vespa暢遊羅馬嘅浪漫畫面，大家到時可以幻想自己係男女主角，嚟個羅馬版嘅「天若有情」又得。

唔講唔知，原來6月2日係意大利國慶日，姊妹話，嗰日利東街誠意邀請所有Vespa電單車收藏者，着上50年代經典服飾，喺下午5點開住自己嘅Vespa嚟參加意大利街頭派對，邊聽意大利音樂，邊歎咖啡，一齊分享Vespa收藏心得，一定好有型。就算唔係Vespa收藏家都可以參加㗎，一齊着上復古服飾參加party，體驗悠閒嘅意式周末啦！