WeChat小程式 推動O2O智慧零售體驗

喺呢個數碼年代，想購物唔止可以出街同網購，仲可以O2O（綫上綫下）嘅形式去購物。WeChat最近就同咗YSL Beauté合作，畀客人綫上訂造自己嘅專屬香水，再去到綫下商店拎貨，呢個Hi-Tech購物體驗一流！

黛安前幾日都去試咗呢個購物新體驗，原來只要喺WeChat入面嘅YSL Beauté小程式上載自己嘅頭像、設計自己想要嘅香水，再親身去到活動pop-up store，「騰訊雲」支援嘅個人影像智能辨識技術就會幫我哋「憑樣取貨」！裝置會根據我哋嘅五官、輪廓等，對比頭像照片嚟確認身份，跟住就會即時自動辨識定單同即場製作香水，效率超高，仲唔使排隊呀！

騰訊香港辦公室總經理譚樂文就話，WeChat小程式不但可以創造品牌同消費者互動嘅場景，更簡化咗O2O購物模式。佢哋遲啲仲會同更多零售品牌合作，各位姊妹要密切留意喇！