LINE FRIENDS Store 進駐apm BT21系列首度打入大中華區

全港最大嘅LINE FRIENDS Store將係下星期四開業啦！今次選址觀塘apm，仲係全球第一間開設LINE FRIENDS Snack Bar嘅專門店，更引入風靡萬千粉絲嘅BT21產品系列，黛安已經急不及待要去朝聖！

繼銅鑼灣同旺角店，次次LINE FRIENDS Store開幕都會引起轟動，今次亦唔例外。公關姐妹話，舊年LINE FRIENDS經LINE Messenger同BT21社交平台，推出韓國超人氣男團防彈少年BTS 8位BT21角色，即刻喺網上爆紅，Sticker貼圖下載達2,000萬次，BT21商品亦喺舊年12月於唔同城市限量、限期開賣，單係美國紐約時代廣場旗艦店，發售當日就吸引咗超過3.5萬人到場搶購，場面非常墟冚！

姐妹話，今次apm係大中華同東南亞區第一、亦都係唯一一間賣BT21商品嘅專門店。黛安第一時間問有咩亮點、產品價錢等，姐妹就話暫時要賣個關子，首日購物安排會稍後公布，好神秘啊。睇嚟要提早排隊掃貨啦。