ICC新動畫登場 暢遊天際閃耀維港

喺熱氣球上遙望山下嘅村莊，望住啲動物喺草原上自由自在咁玩樂，再去到海岸傍，欣賞一望無際嘅大海，睇住船隻揚帆出海，而魚同海龜就喺海裏面暢游；唔好以為黛安去咗旅行，其實係ICC新一輯聲光耀維港燈光音樂表演「天際漫遊」帶咗我去暢遊天際！

呢個表演結合音樂、故事同埋精密控制嘅幕牆燈光，交織成聲光滙演，而且會定期換上新動畫，真係百看不厭！噚日黛安就發現，ICC又換上新動畫「天際漫遊」！呢個新動畫睇到黛安都出晒神，尤其係睇到夕陽西下金光粼粼嘅海面，同埋夜空裏面嘅流星同明月，黛安真係好唔想呢場表演咁快完呀。

好彩「天際漫遊」去到8月31日，每晚7點45分、8點及9點都有得睇。大家可以去IFC Mall 3樓同4樓公眾露天平台，聽住動畫配樂嚟睇，下載手機App「ICC聲光耀維港」喺維港沿岸同步欣賞亦得，得咗！