穿梭歐洲小鎮 感受新體驗 Jetour河船遊睇靚景

香港人鍾意去旅行，黛安都唔例外，傳統美食購物團可能去到悶，河船遊係一個新選擇。Jetour捷旅係河船公司AmaWaterways嘅香港總代理，已經合作近10年，噚日Jetour舉行河船體驗分享會，AmaWaterways嘅創辦人Rudi Schreiner同Kristin Karst仲特登喺美國飛來香港出席。

Kristin提到，郵輪旅遊愈來愈受歡迎，當中河船團嘅增長速度相當快，佢形容郵輪可以帶你去一個國家，但河船就可以帶你穿梭國家，例如深入歐洲小鎮，暢遊多條著名河流，好似多瑙河、萊茵河、法國薩河同亞洲湄公河等，黛安聽到都覺得好吸引！Rudi就話，河船只載百幾人，適合喜愛寧靜嘅客人，每間房都可以睇到河景，船上設施亦好齊備，有齊游泳池、酒吧、餐廳等，即使留喺船上都可以輕鬆下。

AmaWaterways指Jetour喺舊年銷售強勁，特登頒咗個「2017年亞洲區最佳銷售大獎」畀Jetour，Jetour集團主席何柏霆領獎時就話，愈來愈多嘅香港人鍾意深入城市小鎮深度遊，相信河船團會愈來愈受歡迎。

Jetour總經理（客戶體驗及企業發展）梁潔華同黛安講，而家郵輪，包括河船嘅團佔公司業務大約25%，而郵輪嘅營業額每年都有約20%增長，因為郵輪團較悠閒，主要客人都係上咗年紀嘅人或家庭客。

聽講Jetour而家已經推出聖誕節嘅河船團，公關姊妹同黛安講，4月30日前報名仲係優惠價，由於河船團係全球報名，即使係聖誕先出發，好大機會喺6月就會爆滿！黛安約定你船上見！