花展72萬人次入場 展後派5000盤大麗花

一連10日嘅花卉展前日結束，大會話今年入場人次破紀錄超過72萬。黛安就記得大會講過展後會向市民派花，所以噚日就專程去睇下派咩花。大會喺中午12點開始，派發5,000盤主題花大麗花畀市民。早上10點幾已有幾百名市民排隊，人龍仲排到去噴水池近馬路。

康文署署長李美嫦就話，今年花卉展入場人數超過72萬，打破歷年紀錄。花卉展覽委員會主席柯慧兒指，除派給市民外，亦會派發約2.5萬盤不同品種的花卉予學校同非牟利團體，包括康乃韾同三色堇等。佢又話，場內其餘花卉就會分發至康文署轄下公園重置，亦會將凋謝嘅花送至環保署牛潭尾堆肥廠作堆肥。除花卉外，泥土及花盤等都會重用，夠晒環保！

市民排隊嘅時候，仲有工作人員教導佢哋如何照料大麗花，市民亦都可以上康文署網站查看栽種貼士。唔少拎花嘅市民都覺得派花俾市民好環保，佢哋都希望大會下年繼續派花。公關姐妹話，噚日下晝2點10分已派晒所有花，真係好踴躍呀！