日本國際漫畫賞 兩港漫畫家奪獎

好多人細個都鍾意睇漫畫，其實香港都唔少漫畫猛人㗎，好似被譽為國際漫畫界「諾貝爾」嘅日本國際漫畫賞，最新一屆就有兩套港產漫畫拎獎，分別係戴慶賢嘅《秘密武器》，同鄭健和嘅《西行紀》，都獲得銅獎。

其實今年第11屆嘅頒獎禮，喺上個月喺日本已舉行咗，但日本駐港領事館特登喺香港再舉行一次，頒獎禮噚日喺灣仔動漫基地舉行，戴慶賢領獎時話，一個人嘅成功需要運氣，但亦要努力去做，雖然努力亦未必成功，但起碼一定有得着，聽到黛安好感動；而鄭健和就指《西行紀》得獎並非佢一個人功勞，佢要多謝佢嘅團隊。

黛安睇返兩位得獎者嘅作品，戴慶賢嘅作品《秘密武器》結合港漫打鬥同科幻元素，畫功細膩，色彩運用出色；而鄭健和嘅《西行紀》就以名著《西遊記》為藍本，講《西經》再度下落不明，天庭要派兵搜尋，西行之旅再度上演嘅故事。