歎美食談天賞維港景 豪華郵輪Crystal Serenity

上星期豪華郵輪Crystal Serenity來港三日，公關姊妹Christine邀請黛安上船玩。講起呢隻船就犀利咯！佢屬於最高級、最奢華的郵輪級別，早前從美國出發到東南亞20幾日，原本黛安仲打算趁機在船上住番晚，在維港景色環抱下入睡，可惜因有活動在身，所以最後只在船上吃晚餐。雖然逗留時間不長，不過當晚都好開心，因為可與《晴報》社長麥華章、專欄作家查小欣及方健儀等好友相聚。

吃飯時，Christine介紹船上一種既特別又有趣嘅職業，就係和客人跳舞嘅男職員。據講，由於船公司留意到不少結伴去郵輪假期嘅旅客都係年紀較成熟嘅女士，但係喜愛跳舞嘅佢哋，每每因缺乏partner而未能到舞池娛樂，故這些男職員就係佢哋的選擇。黛安同一眾姊妹均十分好奇，話有機會要同佢哋切磋下舞技。

咪睇我哋咁寫意上郵輪玩，其實當日上船嘅都係大忙人。好似方健儀咁，當日剛好做完另一活動嘅司儀趕過去，第二朝吃完早餐就要匆匆離開，為另一活動做嘉賓；而Christine自己當日亦遲咗上船，原因係要陪老闆同一班外國嚟嘅賓客到雲頂夢號參觀，同樣馬不停蹄。

好彩忙咗成日，可以喺維港美景下歎歎美食、談談天放鬆心情。當晚黛安還拍到古雅帆船「張保仔號」喺夜色下航行嘅一幕。後來睇facebook先發現，原來從事葡萄酒直銷的Winnie，當時正與外籍老闆Tony喺船上觀光。咁都能遇上，真係有緣呢！