遊海港城 賞當代藝術品 酒店房化身ARTY Room

海港城一直對推動藝術不遺餘力，咁啱3月係香港「藝術月」，海港城會喺馬哥孛羅香港酒店12樓舉辦Harbour Art Fair 2018，展覽日期由今個月23號至26號，有來自韓國同其他亞洲國家共50間畫廊嘅頂尖及新晉作家嘅藝術作品展出，今次展覽仲係第一次喺酒店展場加入互動元素，將1215及1216號酒店房間變成「15．16 ARTY Room」，配合酒店環境，展示唔同藝術主題，大家可隨時同展品互動，仲可以打卡呃like！

另外，黛安知道喺海港城會有延伸活動配合Harbour Art Fair 2018，依家開始至下月3日，海港城商場內唔同地方會展出3個嚟自韓國藝術家嘅藝術品，等各位行街之餘，仲可以做下文青！

公關姐妹介紹，喺海運大廈露天廣場，就會展出韓國藝術家卞大龍嘅北極熊雕塑，佢嘅作品大部分同生活息息相關，卞大龍覺得面對冰川溶化嘅北極熊，就好似被主流世界逼到邊緣嘅人，都係咁需要關心同注視，畀到佢創作「可愛卻顯瘦弱」嘅北極熊雕塑靈感。

而「海港城‧美術館」就會展出藝術家ENJO展覽名為「幾何符號」，佢嘅平面作品有立體錯覺，但立體作品反而有平面特質，其實係想探討人眼所見嘅空間係咪真實。

港威商場展覽大堂II就有韓國新晉藝術家盧濬嘅首個個人展覽，盧濬嘅作品常思考點修復人與動物之間嘅關係，佢創作嘅角色都有可愛動物樣同人類身軀，佢希望有朝一日動物同人類能融為一體，就好似佢嘅作品一樣。等黛安今個星期六都約姊妹去海港城行街，順便吸收下藝術氣息先！