勇跑蘭桂坊 為婦女動力基金籌款

黛安時不時都會去蘭桂坊，同朋友暢飲歡聚！但原來蘭桂坊附近嘅街道，係好多跑者心目中非常刺激嘅跑步路綫！

第二屆「跑者無極」路跑賽事將於4月15日喺中環蘭桂坊舉行。今年比賽類別共分3組，除咗上年都有嘅5Km同無極組個人賽賽事外，今年更新增無極組二人接力賽。起點會由石板街開始，途經藝穗會、天主教聖母無原罪主教堂、香港動植物公園再返蘭桂坊終點。沿路包括路跑賽道、上斜、落斜同樓梯，真係少啲腳骨力都唔得呀！

活動創辦人Elco本身都係跑步愛好者，佢就話，希望提供獨特路綫和嶄新比賽模式，畀熱愛跑步嘅朋友。而上年比賽中獲得冠軍嘅越野跑手曾小強都話路綫唔容易，建議參賽者要多鍛練，尤其斜路。

黛安知道大會仲會將部分報名費收益，撥捐HER Fund婦女動力基金，為推動性別平等出一分力。咁有意義又刺激嘅賽事，鍾意跑步嘅朋友千奇唔好錯過呀！