誠哥又捐錢！千萬助教大推電子學習

人稱「超人」嘅長和系主席李嘉誠真係為善不甘後人，早幾日先捐完$1,000萬畀惜食堂，噚日黛安又收到風，原來一向重視教育嘅誠哥，早前透過李嘉誠基金會捐咗$1,000萬畀教育大學推廣電子學習平台，仲設立獎學金表揚喺體育、音樂、視覺藝術等領域成績優秀嘅學生，希望佢哋可以學以致用，將來回饋社會。

依家嘅學生學習，唔再只係書本上，黛安聽公關姐妹講，基金會捐款支持嘅電子學習平台，包括「基石數學」（Cornerstone Maths）同「Arguendo」。前者由史丹福國際研究所開發，推動本地中學數學科電子學習；Arguendo則由多倫多大學設計，結合英語學習，發展批判性思維。誠哥之所以資助呢兩個咁先進嘅平台，係希望以優質教學方法裝備本地在職老師及準教師，從而惠及學生，豐富佢地嘅學習經歷。

設6項獎學金

教大校董會主席馬時亨話相信受惠嘅學生，日後將會係多個領域為社會作出貢獻。其實除咗推動電子學習平台，教大仲設立6項獎學金，表揚喺體育、音樂、視覺藝術嘅優秀學生。其中一位得獎者、教大體育教育榮譽學士一年級學生林曦彤，中學時已加入乒乓球隊，喺學界比賽創下7場連勝嘅個人賽紀錄，仲兩度獲得香港學生運動員獎。表現卓越嘅佢，希望成為一位體育老師，佢話除咗想教學生打波之外，更希望向佢哋灌輸確嘅待人處世態度，建立良好品格。黛安相信，佢將來一定會係一位好老師呢！