迎第1000萬名旅客 HK Express豪派大利市

噚日機場好熱鬧，原來係HK Express提早同旅客拜年，仲為迎接第1,000萬名登記旅客豪派大利市！幸運兒獲得一年免費機票，可以無限次搭HK Express飛去所有航點，真係狗年行大運啊！

而乘坐HK Express香港飛往大阪關西航班UO3898嘅梁小姐，就成為咗HK Express接載嘅第1,000萬名旅客，佢話收到呢封大利市夠晒驚喜，仲話「簡直難以置信！」。

梁小姐話會好好利用呢年嘅免費機票，會去峴港或者布吉，享受陽光與海灘，又或者去清萊食餐好嘅。

為咗慶祝呢個歷史性時刻，HK Express商務總監Jonathan Hutt特意打扮做財神爺，拎住金元寶同該客機嘅旅客大派折扣優惠禮券，黛安都覺得夠晒親切，而營運總監鄔潤宙更化身機長，同乘客打成一片！

無緣收大利市嘅人，仲有機會啊！即日起至星期五下午6點前，HK Express特別推出$98起單程機票優惠。唔講咁多，黛安要去搶飛啦！