資深報人講述香港報業史 《晴報》社長麥華章大談記者生涯

本港報業發展歷史悠久，首份中文報刊原來係165年前已面世。樹仁大學新聞與傳播學系系主任梁天偉教授同副教授黃仲鳴博士，合力開展一個「香港報人口述歷史」嘅研究計劃，用口述形式訪問咗28位本港資深報人，將香港報業百年輝煌史呈現，輯錄成《數風流人物-香港報人口述歷史》一書，其中香港經濟日報集團董事總經理兼執行董事/社長及晴報社長麥華章，就係其中一位受訪報人。

訪問中，麥社長大談年輕時成為首批加入報界嘅大學生之一，仲透露當年讀港大時參加學生會，參與唔少社運，喺爭取中文成為法定語文運動（簡稱「中文運動」）嘅示威，有不少參與者遭拘捕、毆打，被留案底，畢業後因而不能加入政府或跨國大公司，麥社長亦懷住一顆關心社會嘅心，1973年加入《文滙報》做記者，月入只有$350，而當年做學位老師有$1,300，美資銀行訓練生就有$1,700。

佢話，曾經喺70年代跟隨中國新聞代表團，隨國家領導人到西方外訪，形容前國務院總理華國鋒好拘謹、前國家領導人鄧小平就好瀟灑；佢都曾去柬埔寨做戰地記者，親身經歷戰場上屍橫遍野、炮彈從頭頂掠過嘅場面。1981年10月，佢被派去英國開辦歐洲版文滙報，任職倫敦分社經理，1985年返港升任《文滙報》副總經理，到1988年離職，聯同中學時認識、現任經濟日報集團主席兼CEO馮紹波等人創辦《香港經濟日報》。

書中仲訪問咗唔少重量級報界人物，有好多研究香港社會變遷彌足珍貴嘅一手材料，本書已上架，黛安都唔可錯過。