歷來最強國際隊伍獻技 創意花車巡遊賀新春

農曆新年除咗去拜年、行大運，當然唔少得睇新春花車巡遊啦，今年嘅滙演主題係「開年、開運、開心」，喺大年初一晚8點舉行，當晚會有9架花車、14支國際同11支本地表演隊伍，陣容係歷來最強，預計有成15萬人次到場！

黛安每年都會同屋企人睇花車滙演，公關姊妹講，今年仲會有台灣世界冠軍隊伍「鈴式主義」表演依家最hit嘅扯鈴、美國13項世界紀錄保持者「XPOGO極限彈跳隊」表演極限彈跳桿；而且滙演開始前會安排大概30個表演團體沿着巡遊路綫上演舞蹈、魔術同埋街頭音樂助興！

今年多部花車都非常有創意，賽馬會嘅花車會第3架出場，花車上有金光閃閃嘅馬蹄鐵造型風車，仲可以見到金光閃閃嘅駿馬飛騰雕塑；風車象徵萬事順意，而馬蹄鐵喺西方代表幸運，糅合咗中西方文化！公關姊妹話，舊年全運會獎牌得主、馬術運動員黎嘉怡同見習騎師巫顯東會喺花車上同市民拜年，而馬會吉祥物「同進啦啦隊」11個成員都會換埋賀年造型一齊亮相呀。

海洋公園同樣有靚靚花車登場，今年主題係狂熱嘉年華，吉祥物威威會帶埋6位好朋友一齊登場。750張花車巡遊門票會喺今個禮拜六（2月3日）朝早8點起公開發售！內容咁精采，黛安都要排定隊去搶飛喇！