帶狗狗海濱漫步 籌款支持愛協

黛安噚日去咗希爾思同香港愛護動物協會（愛協）喺香港迪士尼樂園舉辦嘅「全城狗狗行善日」，活動吸引咗2,000人，包括多個高官名人，同超過1,000隻可愛嘅狗仔一齊參與，好似食衛局局長陳肇始、愛協會長傅明憲主持開幕，愛協青少年動物拯救隊大使郭秀雲、名人趙式芝、楊如芯、女子桌球世界賽冠軍吳安儀等都有出席參與。

愛協執委會主席關家穎話，多年來參與慈善步行日嘅人數已超過3.8萬人，而參與嘅狗隻亦超過2.2萬隻，好感謝市民用善心籌款，讓協會繼續幫助更多動物。

步行結束後，仲有個盛大嘅嘉年華會，當中有人狗齊運動、GOGO迷宮狗、狗狗積木精品展等多個精采環節，黛安都玩得好盡興。