700呎日式藥粧專區 進駐觀塘一田

女為悅己者容，黛安都屬貪靚一族，不過係為悅自己而容！黛安知道，一田喺觀塘嘅分店開咗一個全新嘅日式藥粧概念專區，場地超過700呎！裏面劃分咗三大區域，當中包括美容化粧區、藥品同營養產品區同個人護理用品區，有齊多款日本嘅美粧品牌同大熱嘅人氣商品，簡直就好似親身去咗日本血拼咁！

過百款面膜任揀

每個區除咗引入好多日本當地嘅限定版之外，仲有一田喺香港首賣嘅日式藥妝產品，例如健康美容食品FINE JAPAN系列，同埋促進身體排毒嘅日本Metabolic酵素，美容化粧區仲有超過100款面膜任揀，除咗大熱品牌Lululun之外，仲有吉蒂造型面膜𠻹，黛安到時一定出現選擇困難症！

黛安仲知道一田為咗慶祝日式藥粧概念專區正式開幕，聯乘咗多個品牌推出開幕期間限定嘅購物禮遇，黛安等陣就要約埋班姊妹一齊去掃貨！