工程燈變藝術品 「小燈人」照亮海港城

香港度度都有工程進行，黛安每逢夜晚喺街見到道路警示燈閃下、閃下，就好似見到星星咁！有藝術家就利用工程燈概念，製造出一件件藝術品，最近「海港城．美術館」連同本地藝術家Kila Cheung（章柱基）舉行個人作品展《Twinkle Twinkle Little Guys一閃一閃小工程》，展出30件重新繪畫嘅小燈人作品，同埋喺香港唔同地方拍攝嘅30張小燈人相片。

30個小燈人代表香港唔同人物，包括小運動員、小救生員同小我們等。大家只要由即日起到今個月21日，去尖沙咀海港城就睇到喇！