日本雪糕物語登港 歎金箔CREMIA軟雪糕

雖然近日天氣開始涼涼地，但鍾意食雪糕嘅黛安又點會理咁多，尖沙咀近日開咗間「日本雪糕物語」，集合咗多款日本人氣雪糕，包括期近期大熱嘅CREMIA軟雪糕，聽講係用咗25%北海道優質鮮奶油製成，口感濃醇馥郁、質感細膩柔滑，仲會配上鬆化嘅法式餅乾儂格酥（langue de chat）曲奇脆筒。

公關好友講，「日本雪糕物語」特別引入咗14款日本軟雪糕，當中包括女仔最愛嘅「甜美生果系」，佢會用日本最當造嘅優質水果嚟做雪糕，今次打頭陣嘅有山形縣特產La France西洋梨，入口香甜清新、果味濃厚。如果鍾意食朱古力、抹茶嘅朋友，就一定唔可以錯過呢一款集合朱古力、宇治抹茶嘅旋風軟雪糕，可以一次享受兩種口味。「日本雪糕物語」仲首次係香港推出金箔、金枕頭榴槤味CREMIA軟雪糕。咁多款雪糕，要高貴有高貴，有獨特口味有獨特口味，黛安都畀like！