中上環燈柱換新裝 港建築師用光影現舊城

中上環近年多咗好多文青Café，黛安放假都會約埋班姐妹去歎咖啡，順便影下文青相。

黛安近日行經中環，就發現附近嘅燈柱，出現咗一啲五彩繽紛嘅設計、就好似好似舊式招牌咁，非常有特色。好奇打聽，原來喺由4位參加旅發局設計比賽嘅得獎者操刀，姐妹們又有新打卡位啦！

旅發局公關姐妹話，8月1號至9月11號，旅發局同香港建築師學會、香港城市設計學會、「香港品牌」同中西區區議會，合作舉行「舊城中環燈柱設計比賽」，有26組參加者參與，最後由本土建築師馮達煒（Ken Fung）和麥憬淮（Kevin Mak）設計嘅「舊街投影燈」，同居港荷蘭裔城市設計師Matthew Gevers同Marta Marotta設計嘅「智能路標」勝出。

聽Ken介紹，設計嘅靈感係源自香港獨有嘅舊式招牌，再用創新嘅光影手法，投影出17個代表舊城中環歷史文化故事嘅招牌，好似有華僑日報、文武二帝及百子里等嘅字樣。

聽公關姐妹講，旅發局希望藉住呢次推廣，為中上環一帶嘅燈柱換上「期間限定」新裝，而旅客只要掃一掃燈柱上嘅QR Code，就可以獲得「舊城中環」嘅相關資料。

得獎作品已經安裝喺上環荷李活道一帶嘅32支燈柱，大家可以由即日起至明年1月31號去欣賞啦！