獲頒教授榮譽 馬時亨分享管理之道

港鐵公司主席馬時亨教授噚日獲香港管理專業協會頒授實務教授榮譽，馬教授仲同記者分享多年來嘅管理心得，就係3個「ion」，「vision、execution同communication」。佢話自己舊年年初上任港鐵主席時，已第一時間同近千位經理級嘅管理層同事分享呢3個「ion」嘅重要性，即係目光要遠大、執行要利落、溝通要全面。董事局、管理層同員工各司其職，令港鐵嘅網絡不斷喺本地同海外拓展。一齊獲頒實務教授嘅仲有藝術家靳埭強、企業家楊敏德，表揚佢地對管理發展嘅貢獻。

講開港鐵，黛安收到風，港鐵會喺今個月26號一連4個星期推出限量版「MTR x KUMAMOTO」紀念車票，「港鐵友禮會」會員可以今日起至下星期二，登入http://www.mtrclub.com.hk優先訂購，售價150蚊，仲有機會贏得雙人來回日本機票連熊本縣3晚住宿添！