行市集 塗彩繪 合家歡玩轉萬聖節

下星期就係萬聖節，大家諗好去邊到玩未呢？近年各大商場都有唔少好玩嘅萬聖節活動，為大家提供主題樂園以外嘅合家歡選擇。好似今年咁，黛安就覺得黃埔新天地、荷里活廣場、同埋荃新天地嘅活動都幾吸引，大家不妨留意下！

黛安覺得，荷里活廣場最有恐怖feel，事關佢哋今年以「荷里活『醫』間酒鬼Bar」做主題，喺本月29號同31號推出由香港調酒學校嘅專業調酒師調製、以吸血鬼眼、怪醫變身水、毒舌之吻等做主題嘅6款Mocktail，其中「怪醫變身水」仲係用當下最潮嘅芫荽、苦瓜同山葵3種怪味食材做材料，真係要夠膽量先好試！

文青又可考慮去荃新天地，因佢哋28至29號會聯同本地創作平台LOCOLOCO搞《萬聖節市集•哈囉派對》，有超過60個檔攤，仲有得玩萬聖節人體彩繪、指甲彩繪、特技化粧等，仲有live music聽呀！

黃埔新天地嘅「星際反斗樂園」就老少咸宜啲，同樣喺28至29號，有彈彈床、南瓜層層塔、反斗相館等，畀有小朋友嘅姊妹們一家大細一齊玩，啲場景設計仲好得意，唔怕嚇親小朋友啦！