參觀巨型罐頭藝術展 撑惜食堂兼助人

藝術裝置有好多種，用罐頭由人手一罐一罐砌成嘅慈善藝術展品，大家又睇過未呢？嚟緊星期六（21號）至今個月30號喺希慎廣場就有得睇喇！黛安聽聞，惜食堂將會舉辦全「誠」罐膳心Canstruction® Hong Kong 2017，到時唔同嘅參賽團體會用罐頭食品，組裝成5件巨型創意裝置作品，展現香港傳統、食品同景物。

今年已經係第五屆Canstruction®比賽，主題係「香港瑰寶」，建築界、設計界、學界同商界等多個團體，將會組隊利用籌到嘅罐頭食品，砌成巨型創意罐頭裝置喺希慎展出，之後大家仲可以投票選出心水作品代表香港參加國際賽！

今年活動仲得到土產卡通人物「麥兜」加持，佢會同惜食堂「米仔」一齊化身做大型罐頭裝置，真係好期待見到由罐頭砌成嘅巨型麥兜呀！如果大家都想支持嘅話，可以用每罐$20嘅形式捐款贊助呢個裝置，全部善款都會用嚟買罐頭，喺完成裝置同展覽之後放喺惜食堂嘅食物倉庫，到第時新鮮食物短缺嗰陣，就可以為需要食物援助嘅人士，提供熱飯餐或者食物包喇。

黛安已經準備好慷慨解囊，希望大家都可以借今次活動幫助香港有需要嘅人，等佢地唔使再捱餓啦。