數碼港復古電競展 親子爭打機王寶座

黛安記得細細個已同表哥、表妹爭住玩炸彈人及Mario賽車遊戲，估唔到數碼港商場今個月萬聖節前夕，同舉辦過三屆香港復古遊戲展覽嘅RETRO.HK合作，喺28及29號連續兩日舉辦「復古電競哈囉喂」；萬聖節加電競，呢個組合真係相當有趣兼吸引！

今次嘅復古電競賽，黛安收到風設有親子杯，4場比賽分單人及親子組，參加者分別會以勁爆熱舞（Dance Dance Revolution）、土星炸彈人（Saturn Bomberman）、瑪利歐賽車（Mario Kart）及魔域戰士（Vampire Savior）4款經典遊戲作賽，爭奪終極大贏家寶座。

之前有報名參加比賽嘅朋友仔就要留意喇，比賽名單將會喺下周二（24日）公布。

經典遊戲多的是，今次數碼港商場同時安排左個大回顧，展出由1970至2010年多款經典遊戲主機，如最為人熟悉的紅白機、雅達利以至近代主機等，又會簡介遊戲機演變歷史。

場內亦擺放咗喺最近40年出現過嘅古董遊戲機及遊戲畀市民試玩，仲有風靡一時的遊戲，好似光槍遊戲、拳王同街霸系列等，小朋友可以即時「落場打機」，同爸爸媽媽回味當年玩遊戲機嘅感覺。黛安唔講住啦，要call定表哥、表妹一齊去回味下先。