熱情精神 打造獅城旅遊品牌

香港人對獅城印象最深刻嘅多數都係魚尾獅、肉骨茶等，最近新加坡旅遊局啟動全新旅遊品牌「Passion Made Possible」，旨在同旅客分享當地以人為本嘅熱情故事、呈現獅城精神，畀大家認識呢個國家嘅另一面。

新加坡旅遊局中國華南地區、香港及澳門區處長黃慶祥喺品牌啟動禮致辭時表示，而家嘅遊客會想深入認識當地、聽更多當地人嘅故事。所以當局決定將新加坡人熱情嘅一面show畀出嚟，話畀大家知，喺呢個國度只要有熱誠，就咩都做到。

地道新加坡人、連續兩年獲米芝蓮一星嘅Corner House創辦人兼主廚Jason Tan，就係最佳例子！佢分享自己曾喺暑假做廚房洗碗，及後立志做廚師，雖曾被睇低，但憑住對烹飪嘅Passion（熱情）終成星級大廚。