$580任飲美酒 嘗洲際酒店名物

真係好想快啲到月尾，事關今個月26-29日，有黛安每年最期待的美酒佳餚巡禮於中環新海濱盛大開幕。昨日黛安有口福，獲旅發局邀請率先品嘗活動高潮日（10月29日）於「品味館」供應的美酒佳餚。

黛安試食完覺得呢個餐好抵食，因為食客只要畀$580，就可一次過品嘗到洲際酒店四大餐廳RECH、Steak House、NOBU及欣圖軒攜手呈獻的頭盤（共六款）、熱盤（六選三）及甜品（四選三），仲可以任飲香檳及紅白美酒。你話係咪好抵呢？

昨日與黛安一齊試食的仲包括《晴報》專欄作家查小欣、美容達人Ling Ling姐（李韡玲）及蛇王芬老闆Gigi等，大家都對食品讚口不絕。講到最受歡迎頭盤肯定非蟹餅莫屬！蟹餅煎得香口，食到絲絲蟹肉，難怪自1982年起已經係Steak House的招牌菜；至於熱盤，好多人食完欣圖軒的金腿瑤柱蘿蔔絲酥都要encore，千層酥做得外脆內軟，餡料富蘿蔔清香；甜品同樣出色，旅發局Cynthia就最欣賞綠茶白朱古力Brownie，而我就鍾意Apple Crumble，食完真係好滿足。

戶外品酒派膠杯

Cynthia提到，今年警方考慮到安全問題，建議旅發局向戶外品酒的市民派發膠杯，所以佢哋會在現場設置多個回收點，事後將膠杯循環再造，減少浪費。