可愛木偶變恐怖角色 迪士尼解構鬼屋設計

黛安之前就已經同大家介紹過今年迪士尼嘅萬聖節鬼屋「詭迷宮︰詭夢實驗室新篇」嘞，唔知大家去咗未呢？究竟點解搞笑可愛嘅故事都可以變得咁恐怖？黛安最近就有幸同鬼屋娛樂表演總監周偉強同埋萬聖節演員傾下偈，聽佢哋分享鬼屋設計嘅概念同表演經歷！

鐵鏈捆鎖 配陰森音樂

周偉強話，將迪士尼故事變做鬼屋係新嘗試，例如小木偶被鐵鏈鎖住，笑臉唔見咗，反而變得憂傷痛苦，配合陰森古怪嘅音樂燈效，已可以令人感到不安。而詭迷宮入面仲有唔少互動情節𠻹，例如進入《怪獸公司》場景嗰陣，參加者為咗逃走要嘗試打開沿途嘅門，之後會有意想不到嘅事發生……同樣令鬼屋變得更刺激！

喺樂園做咗4年萬聖節演員嘅鄧智勇（Gabriel）話，迪士尼好強調故事嘅重要性，演員要清楚明白成個故事及角色性格，再研究角色嘅表情同動作，甚至連其他角色嘅動作同對白都要記入腦！至於點解佢當初會加入迪士尼呢？佢就話自己好鍾意玩，依家有專業團隊幫佢設計裝扮、對白，又可盡情發揮去嚇人，係好難得嘅機會。「見到賓客好投入，又叫又笑，我就滿足！」