新店試食 亞洲風味Gelato 銅鑼灣買1送1

生活其中一大樂趣，就係周圍發掘新嘢食。黛安知道噚日有間意大利雪糕旗艦店「3 ITALIANI」喺銅鑼灣開幕，梗係第一時間過去一試究竟啦！呢間雪糕店佔地2,000呎，提供20種傳統意大利口味同10種亞洲口味嘅gelato，全部都係由師傅現場製作，加入本地新鮮時令水果、牛奶和忌廉炮製，味道正宗，簡直係味蕾嘅一大享受！

Wasabi入饌 配朱古力

黛安好奇，到底乜嘢係亞洲口味gelato呢？原來除咗芒果椰子等熱帶水果口味，仲有Wasabi朱古力、檸檬薑蜂蜜及抹茶等選擇，呢啲口味喺其他地方的確比較少見，推介大家來試試。仲有呀，舖頭標榜食材不含人造色素、防腐劑、人造香料同糖漿，保證美味又健康。

工作人員仲教路，只要去指定網址登記，就可享gelato買一送一，優惠做到下星期日（10月15日）咋！（詳見：http://3italiani.com/offer-chinese/）

除咗正宗意大利雪糕，呢度另有早餐、窩夫、高級朱古力及咖啡供應；食客仲可透過玻璃櫥窗，睇住師傅喺雪糕實驗室內製作雪糕嘅過程𠻹。

黛安同3 ITALIANI主席Mauro Gagliardi傾過，原來間舖係由佢兩個囝囝及意大利雪糕大師Vincenzo Iannacone一齊創立。Mauro話兩個囝自幼經常跟佢嚟亞洲，好鍾意亞洲，尤其係香港呢個大都會，所以先決定喺香港開店。今次3 ITALIANI開業，仲得到投資推廣署支持，特登為佢出新聞稿介紹店，認真巴閉！