Panasonic廚藝賽 冠軍芝心炸飯球 蘇玉華讚好味

黛安經常出入大大小小嘅派對，有時食來食去都係嗰幾款食物，都會覺得悶同口淡淡㗎！

好彩上星期六，黛安喺Panasonic舉辦嘅廚藝比賽發現咗幾位城中「隱世廚神」，佢哋整party food都有一手。黛安有幸嘗到冠軍和亞軍製作嘅意式芝心炸飯球及粉紅色天鵝，前者外脆內軟，後者酥香幼滑，令人食過翻尋味！真係要問佢哋攞番份食譜偷師，下次開party等我大顯身手至得。

黛安仲係場內遇見「美女廚神」蘇玉華、帝苑酒店行政總廚麥鴻峰和翠華集團執行董事李遠康，原來佢哋都係今次比賽嘅評審。蘇玉華仲大讚參賽者廚藝水平好高，令佢都學到唔少嘢，又話自己可以試到咁多美食，係世界上最幸福嘅人，希望以後可以幸福落去咁話。做咗美女廚神仲咁謙虛，抵佢長做長有！

赴台角逐終極廚神

講番今次比賽先，公關姐妹就話，冠、亞軍除咗可以得到Panasonic送出嘅電器之外，今個月底（10月28日）仲會代表香港出發到台北，決戰台灣和內地嘅代表，爭取終極廚神嘅寶座，大家記住替港隊打氣。如果黛安到時可以到場見證廚神誕生，咁就好啦！