迪士尼惡人出巡 烏蘇拉霸氣現身

今個月尾就係萬聖節，大家諗好去邊玩未呢？黛安最近就同屋企人去咗香港迪士尼樂園嘅Disney Halloween Time 2017，除咗有詭異嘅鬼屋、惡人出巡，同時又有可愛嘅迪士尼朋友換上Halloween costume巡遊，大人細路都玩得好開心，啱晒一家大細！

今年鬼屋以恐怖風格重新演繹多個熟悉嘅迪士尼故事，好似入咗故事入面咁，恐怖得嚟又親切。至於唔玩鬼屋嘅朋友，黛安就推薦參加下午嘅「米奇Halloween玩轉大街派對」，黛安最愛嘅唐老鴨、Chip‘n’Dale等等都換晒萬聖節衫巡遊，超得意！夜晚就輪到惡人出巡，霸氣海女巫烏蘇拉、巫師賈方、邪惡皇后等等都會出場，一年一度㗎咋，千祈唔好錯過！