大師水禾田指導 以《晴報》創作水彩畫

相信好多人都對水禾田呢位殿堂級繪畫及攝影大師絕不陌生，最近大師嚟咗香港開畫展，由於《晴報》係活動支持媒體之一，所以剛剛過去嘅星期六，《晴報》嘅姊妹就邀請黛安一齊參加咗大師於富豪機場酒店舉行嘅「與水禾田的周末藝遊日」，同另外30幾位參加者度過一個充滿藝術氣息嘅下午。

當日，水禾田親身導賞佢個人畫展《水禾田筆下的香港‧新加坡》。畫展以環保為創作概念，利用報紙描繪香港和新加坡嘅城市景觀，包括香港上環街市排檔、中環街景、新加坡嘅魚尾獅同小印度區等等。最特別嘅係，所有作品都配合報紙內容繪畫，畫作仲會透出部分報紙上嘅內容，意味深長。

當日水禾田親自帶大家導賞看畫之後，仲即席揮毫，示範及親授報紙水彩繪畫技巧，黛安同各位參加者當然唔會放過呢個機會，好好向大師偷師啦！

事後大家並以《晴報》及《經濟日報》嘅報紙，完成自己嘅畫作。當日大家都好投入，黛安亦都好開心完成咗自己第一幅嘅報紙水彩畫呢！

《水禾田筆下的香港‧新加坡》

日期：即日至24/10（星期三休息）

地點：富豪機場酒店二樓