天天海南雞飯 下月葵涌有得食

要食正宗嘅海南雞飯，始終都係要去新加坡食先至夠地道。不過，身處香港嘅大家唔使失望，皆因黛安得到個好消息，就係馳名新加坡、連「地獄廚神」Gordon Ramsay都讚好嘅「天天海南雞飯」，好快將會進軍香港！上星期餐廳仲喺酒店搞咗場試食會打響頭炮，黛安都有去嘗鮮。

呢間「天天海南雞飯」來頭唔細，1986年開店，由一個小檔位做起，發展成今日大受歡迎嘅「米芝蓮美食景點」。平日大家想喺新加坡幫襯，都要排一個多小時隊先食得到，今次「天天飲食集團」為將美味嘅海南雞飯引入香港，負責人蔡敬庭（Charles）透露，早前特登遠赴新加坡、排咗好多個鐘頭隊，先接觸到始創人Madam Foo及佢嘅囡囡黎美筠，最終以誠意打動二人，促成今次合作。

雞肉嫩滑 飯富油香

講番當日試食會嘅主角海南雞飯，認真無得彈！白雞嫩滑可口，口感軟腍；而由雞湯煲製嘅香油飯粒粒分明，鬆散富油香，配上自家秘製、用以沾雞嘅辣椒醬，非常惹味！另外仲有黏稠嘅特製黑醬油，伴住啲飯一齊食，味道一流。食完之後，大家都有個疑問，就係香港分店幾時開呢？據悉佢哋下月會率先在葵涌開設體驗店，地點有待公布，另亦計劃明年在港開設實體店，大家記住密切留意喇！