上海直擊 恒隆廣場大翻新 消費$20萬做尊貴VIC

恒隆地產過去20年積極拓展內地市場，其中喺01年落成嘅上海恒隆廣場Plaza 66，商場面積雖只有6萬平方米，但每年租金收入竟達8億元人民幣！開幕16年，上海恒隆廣場最近完成資產優化計劃，上星期五晚舉行盛大Party慶祝，仲請黛安飛過去參加。當日所見，成個廣場煥然一新，仲有超過100個國際知名大品牌落戶，簡直貴氣逼人呀！

當晚個Party認真盛大，有超過2,000名嘉賓及國際品牌管理層等出席，大會仲請來殿堂級歌手Alicia Keys獻唱名曲，掀起活動高潮。黛安聽恒隆地產董事長陳啟宗講，隨住內地消費力不斷上升，未來集團仍會積極拓展內地業務；而陳啟宗嘅公子、恒隆執董陳文博（Adriel）就話，今次翻新嘅style係classic modern。

花$100萬 才能用貴賓室

當日恒隆公關猛將關則輝（CF）帶黛安同多家傳媒參觀商場。CF話廣場新設咗一個VIC（Very Important Customers）計劃，VIC將可享用商場內貴賓室，內有會客廳同梳粧間等。至於點先可以做到VIC？就係12個月內消費最少20萬元人民幣，但若要享用貴賓室等更尊貴設施，就最少要消費100萬以上嘞！