GOGOVAN義載物資 援助澳門災民

上周颱風天鴿襲澳門，搞到停水停電，缺水缺糧下，好多人都想幫下手。前財爺曾俊華噚日就喺fb出po，極讚GOGOVAN未上市已咁成功。黛安就喺留言發現，有網民特別多謝GOGOVAN幫手義載畀澳門災民，GOGOVAN創辦人林凱源（Steven）就話一向都好低調做善事，唔希望畀人話「抽水」。

個網民就話當日如果唔係得GOGOVAN幫手，物資未必喺24小時內送到過去。Steven話，颱風之後，知道澳門面目全非，唔想隔岸觀火，就聯絡一班朋友，如果有需要幫手就出聲。某一日凌晨就收到電話，話有幾十板、600箱物資要幫手由上環載去油麻地卸貨區上船。Steven一聽到就即刻落order，調咗2部大貨車去幫手。佢仲講笑話，對方根本唔知佢就係創辦人。Steven話，全公司得3個人知道件事，「我同同事講明，做善事唔可以抽水，嗰啲係叫marketing。」