陳裕光伉儷結婚40年 以絲襪妙論婚姻

一對夫婦，能攜手走過甘苦喜樂40年，真係唔容易！大家樂集團前主席陳裕光（Michael）同佢太太羅寶靈（Pauline）結婚40周年，上星期六（19號）喺兩人創辦嘅婚宴場地科學園ClubONE舉辦「紅寶石婚」紀念晚宴，筵開近30席廣邀生意夥伴、好友及鄰居一齊慶祝，真係sweet到漏呀！

合拍表演華爾茲

黛安都有獲邀出席晚宴，仲遇到《晴報》社長麥華章。眾所周知，Michael同Pauline都好鍾意跳舞，所以當晚喺場地中間設咗舞池畀大家跳舞，佢哋兩個仲表演華爾茲，合拍度滿分！兩夫婦仲準備咗小禮物畀賓客，包括一隻有四系列歌曲嘅CD，每一系列歌曲都代表唔同階段嘅10年，加埋就啱啱好係40年，相當有心思。

有人話結婚40周年叫「紅寶石婚」，係因為兩人嘅熊熊愛火經歷咗40年都無被磨滅。不過Michael就有另一套對婚姻更有趣嘅演繹方法！佢形容夫妻相處之道就好似絲襪一樣，千依百順、柔順貼身的話，大家都自在舒服；而且絲襪能屈能伸，喺風雨中為對方擋風沙，黐身之餘又有透氣空間，咁先可以風雨同路，甘苦與共喎！聽見Michael咁絕妙嘅「絲襪理論」，大家當然拍爛手掌啦！