銅鑼灣HABITŪ 明日派玫瑰特飲

夏天熱辣辣，行街無番杯透心涼嘢飲點得啊？早排HABITŪ喺美麗華免費派過玫瑰蘋果喜冰樂，造福了唔少shopping精，聽公關姐妹放風，原來聽日（8月12日）HABITŪ會再喺銅鑼灣希慎廣場分店度免費派玫瑰蘋果喜冰樂﹗想飲好簡單，只要當日下晝4點到5點到場，like一like官方fb，同埋喺舖頭花牆度影張靚相打下卡，即刻可免費試飲喜冰樂（約6安士）。另外，即場喺分店買衫滿$200，仲可以由專人幫手即影即有一張；下星期六（19日）都仲有得影㗎！

講開飲正嘢，利東街都有間精品咖啡及手工朱古力店Oak推出咗個人化服務，可以訂製個人專屬嘅朱古力磚同埋手沖精品咖啡包，點飲都咁啱口味。聽駐店咖啡師講，咪睇咖啡包平平地賣$12-$18，原來連極高質既巴拿馬藝技咖啡豆都有得揀，而且沖法好簡單，用93度熱水焗25秒就可歎杯正咖啡了。