電競節閉幕 林鄭貼韓星照吸Like

啱啱過去嘅周末，香港就第一次舉行咗電競音樂節，連特首林鄭月娥都有去捧場。噚日朝早，林鄭啟程去北京拜訪中央部委之前，仲將自己與韓星嘅合照上載fb，並用韓文寫道：「好多謝您哋嚟香港表演！」。相中嘅林鄭舉起V字手勢與一眾韓星合照，估唔到佢都有咁少女嘅一面呢！

會場內外 激戰連場

電競音樂節上星期五喺紅館揭幕，噚日來到決賽，由中國內地隊與港澳台聯隊一決高下，爭奪冠軍寶座，最後中國內地隊成為電競王！

場內鬥得難分難解，場外就愈玩愈盡興。雖然烈日當空，但有唔少年輕人都特意來試玩各式各樣嘅電競產品、虛擬實境等，十足十嘉年華會咁。有參展商仲話短短3日嘅展期生意已有6位數字，睇嚟下年可再接再勵！

除咗電競賽外，星期六晚大會仲喺紅館開設《SMTOWN SPECIAL STAGE in HONG KONG》演唱會！黛安作為韓迷，好好彩搶到$1,380嘅門票，可以一次過睇晒EXO、Super Junior D&E、SHINEE、Red Velvet等8隊勁hit嘅組合表演，完全值回票價！當晚黛安特別提早1個鐘到場睇Oppa，點知7點鐘場外已有大批粉絲排到打晒蛇餅，真係唔好睇少Oppa嘅魅力。好彩人流管制做得好好，一啲混亂都無，好快就入到去啦。黛安坐藍區第二行，至於特首林鄭月娥坐就第一行，可以近距離睇，真係好羨慕佢個位咁靚呢！