迪士尼推港人優惠 4折住新酒店

香港人有好消息呀！黛安收到風，香港迪士尼樂園即日起推出港人尊享嘅全新酒店住宿優惠，只要喺今個月13號之前，預訂8月內入住最新開幕嘅迪士尼探索家度假酒店，就可以4折嘅至筍價$1,488，於星期日至四入住標準客房；想睇到海景都只係$1,588咋。平日無時間？唔緊要，星期五或六入住都有優惠，由$1,688起，如果大家係「奇妙處處通」會員再抵啲，35折就住到。暑假仲未諗節目？快啲去訂房啦！

好姊妹同黛安講，今年4月新開嘅迪士尼探索家度假酒店，喺4個庭園設計花盡心思，當中種咗17萬棵來自亞洲、大洋洲、南美洲同非洲嘅植物，可以教小朋友愛護大自然，而且庭園中央有「雨澄泳池」，最適合一家大細喺炎炎夏日降溫。

入住新酒店仲可玩盡另兩間酒店嘅康樂活動同設施，例如你可一朝早去迪士尼樂園酒店同高飛耍太極，夜晚去到迪士尼好萊塢酒店「鋼琴型泳池」，坐喺兒童迷你汽車上睇電影，節目豐富！