煤氣公司出Hello Kitty爐具 名模都Like

大熱天時，放假除咗約朋友出街，其實仲可以喺屋企煮飯仔，唔使同人逼。煤氣公司旗下品牌TGC，就破天荒首次推出限量版Hello Kitty嵌入式平面爐，黛安噚日見到都即刻愛上，仲有加埋約30款造型超萌的Hello Kitty廚具及用品。快啲話畀媽咪、老公知，係時候換爐啦！

噚日大會仲搵咗同為Hello Kitty粉絲的藝人Anjaylia及出過烹飪書的Danielle做嘉賓。聽講Anjaylia亦儲落一大堆Hello Kitty公仔、化粧品、擺設及文具，正籌備裝修婚後愛巢嘅佢，決定新居也要加入這個卡通人物的元素。佢透露未婚夫廚藝出色，仲對明火煮食有份執着，認為咁先夠鑊氣，相信呢套爐具一定滿足到佢兩公婆。

寓烹飪於育兒

帶同囡囡一齊亮相的名模Danielle就話，平時會將烹飪與育兒結合，所以子女2歲大就鼓勵佢哋入廚，大家可以一邊煮食、一邊傾偈，好似玩遊戲咁，好有樂趣。昨日囡囡Sophia見到Hello Kitty爐具，亦大讚可愛，仲話想用嚟整Hello Kitty意粉𠻹！

講番呢套爐具，一共有櫻花粉紅和時尚灰黑兩種顏色揀。不過話明係限量版，只有500套咋，售價$5,680，真係手快有手慢無。下月底TGC另會推出其他廚具，例如Hello Kitty玉子燒方形煎鍋、平底鑊等，望住嚟煮嘢食，人都開心啲，餸菜可能都會好味啲！