AEON 30周年 小雲小吉陪你放暑假

「小雲同小吉好重要！」相信《IQ博士》粉絲肯定識唱呢首主題曲。兩大主角小雲同小吉噚日上咗嚟《晴報》編輯部探班，仲偷偷地同黛安講咗個秘密呀！原來AEON為慶祝開業30年，下星期五（21日）起，會舉辦「IQ博士陪你放暑假」活動，為打響頭炮，當日至8月31日，會喺康怡AEON STYLE設置主題拍照區，除咗有13呎高嘅半立體天神村茶壺屋之外，仲有11.5呎嘅半立體IQ博士屋企，當然唔少得小雲同小吉、博士、宇宙大王等一班主角同大家selfie啦！

同一日開始，喺AEON消費滿指定金額，仲可以超抵價換走IQ博士限量版布袋、雨傘或保溫食物壺！如果粉絲們想同小雲見面，記得mark實7月22、23同29號呢3日，因為佢會遊走康怡、黃埔、屯門等9間分店，詳細留意店內公布呀！